Vestland fylkeskommune samlar til felles stand – Havfylket Vestland

Vestland fylkeskommune samlar regelmessig sjømataktørar til kunnskapsdeling og samråding, og denne gongen har vi samla til ein fellesstand på Aqua Nor 2025. På vår fellesstand, Havfylket Vestland, har vi med oss ti verksemder: Brim farm AS, Westcon Hexacage AS, Tidalx, Norce Research, OPTIRAS A Searas company, F-Tech AS, Bia Miljø, Guard, Framo AS og Koda group. 

Vi vil også vere godt representert med vidaregåande skule, opplæringskontor og Fagskulen Vestland med ein eigen stand på fellestanden. Fylkeskommunen vil elles synleggjere nokre av prosjekta sine og informere om kva vi arbeider med. Vi serverer godbitar frå Havlandet, og besøk oss gjerne på A-129. Meir informasjon om Vestland fellesstand finn du på www.havfylket.no.

Besøk gjerne vårt moderne opplæringsfartøy – Skulebas
Ei vellukka satsing på berekraftig sjømat fordrar tilgang på god arbeidskraft. Det er difor ekstra kjekt å ha med elevar ved Måløy vidaregåande skule, som kjem med det moderne opplæringsfartøyet Skulebas. På den nye Skulebas vert det gjeve opplæring til elevar som skal bli fiskar, matros, skipsmotormekanikar, kokk og navigatør. Mannskap og elevar vil vere å treffe på Skulebas, og du kan gjerne få deg ei omvising ein av messedagane. Du finn oss på Skansen. 

Styrka samarbeid om berekraftig akvakultur i Vestland
Vestland fylkeskommune har samla til ein felles innsats for å legge til rette for ei meir berekraftig akvakulturverksemd inn i framtida. I form av eit større samhandlingsprosjekt. For å styrke den marine innsatsen, samarbeider mange aktørar frå offentleg sektor, akvakulturnæringa og kunnskapsmiljøa for å lukkast med å produsere mat med betre dyrevelferd og mindre påverknad på miljøet vårt.

Det dreg seg til med arealutfordringar, og god planlegging og oppdaterte arealplanar er naturleg nok eitt av innsatsområda. Dette fordrar tettare samarbeid med kommunane, der ein ser større område i samanheng for å sikre ein god bruk av dei areala som er disponible. Det vert elles m.a. arbeidt med tiltak innan kompetanse og rekruttering, og god ressursutnytting gjennom sirkulærøkonomi. Gjennom samhandlingsprosjektet har vi også delfinansiert og knytta til oss ei rekkje prosjekt, som vi samlar for samråding og erfaringsutveksling.